İsveçrə mühəndisləri implantasiya olunan yanacaq hüceyrəsi hazırlayıblar. İmplant çay paketinə bənzədiyi üçün belə də adlandırılıb.

Aztibb.az involta.media-ya istinadən yazır ki, “Çay paketi” I tip şəkərli diabetdən əziyyət çəkən xəstənin orqanizmində insulinin səviyyəsini tənzimləyir və onun iş prinsipi insulin nasosunun işinə bənzəyir.

Bununla belə, cihaz etibarlı enerji mənbəyi tələb edib. Mühəndislər bu problemi asan şəkildə həll ediblər.

“Çay paketi”nin mərkəzində qlükozanı qlükon turşusuna, eləcə də elektrik dövrəsini yaradan protona parçalayan mis nanohissəciklər var. Alginatdan (yosun əsaslı material) hazırlanmış parça implanta bədən mayelərini udmağa imkan verir və daimi qlükoza yanacağını təmin edir. Bu, cihazı faktiki olaraq qeyri-məhdud enerji mənbəyi olan daxili insulin nasosuna çevirir. Eyni zamanda, cihazın gücü qanda qlükoza səviyyəsi ilə bağlı məlumatları smartfona ötürmək üçün də kifayətdir.

Cihaz prototip mərhələsində olsa da, o, artıq laboratoriya siçanları üzərində ilk sınaqlardan uğurla keçib. Bütün lazımi testlərdən sonra implantın kütləvi istehsalına keçilərsə, insulindən asılı tip 1 diabetdən əziyyət çəkən insanların arzusuna çevriləcək.