Qulaqda kəskin ağrı çox vaxt ya xarici, ya orta kəskin otitin əlamətidir.

Ağrıları oxşardır, ona görə də “Google”dan kömək istəyib differensial diaqnoz qoymaq mümkün deyil, hətta həkimin onlayn konsultasiyası da mənasızdır.

Aztibb.az xəbər verir ki, otolarinoloq Rəşad Guvalov bununla bağlı instagram səhifəsində məlumat paylaşıb.

“Kompüter ekranından həkim problemin xarici yoxsa orta qulaqda olduğunu təyin edə bilmir, yəni damcılarla kifayətlənməsinə yoxsa əsaslı antibiotikoterapiya təyin edəcəyinə qərar verə bilmir. Özbaşına isə qulağa damcı tökmək olduqca təhlükəlidir”, – həkim bildirib.

Qeyd edib ki, əgər qulaq pərdəsində zədə varsa, oradan keçən bəzi damcılar orta qulaq boşluğu və ya eşitmə sinirinə toksik təsir göstərə bilər.