Diabetik neyropatiya - şəkərli diabeti olan xəstələrdə qanda şəkər səviyyəsinin uzun müddət yüksək olmasına bağlı olaraq sinir liflərinin zədələnməsi ilə gedən xroniki ağırlaşmadır. Xüsusilə aşağı ətraflarda rast gəlinən polineyropatiya infeksiya və işemiya ilə birlikdə ayaq amputasiyasının ən önəmli səbəbidir.

Aztibb.az xəbər verir ki, bununla bağlı endokrinoloq Rəhilə Mansur instaqram səhifəsində məlumat paylaşıb.

Həkim qeyd edib ki, bu hal hər iki növ diabetlilərdə (tip-1 və tip-2) rast gəlinən və əsasən tip-2 diabetlilərdə üstünlük təşkil edən ağırlaşmadır. Neyropatiya əsasən aşağı və yuxarı ətraflarda daha çox rast gəlinir (periferik neyropatiya).

“Periferik neyropatiyanın əlamətləri yuxarı və aşağı ətraflarda keyimə, qarışqagəzmə hissi, hissiyatın azalması, əzələ zəifliyi və gücsüzlük, xüsusilə axşam artan ağrılar, ayaqlarda yara, sümük və oynaq ağrısıdır”, – həkim bildirib.

Endokrinoloq vurğulayıb ki, bu əlamətlərlə yanaşı diabetik neyropatiya həzm sisteminin pozulması, ağrısız miokard infarktı, hipoqlikemiyanın fərqində olmama, cinsi funksiyanın zəifləməsi şəklində də özünü biruzə verə bilər. Bütün ağırlaşmaların qarşısını almaq üçün qanda şəkər səviyyəsinə nəzarət olunmalı və mütəmadi olaraq müayinələrdən keçmək lazımdır.