Körpələrdə əmmə refleksləri çox güclüdür. Bu refleks hələ ana bətnində ikən başlayır və yeni doğulduğu andan etibarən davam edir.

Əmzik istifadəsi körpələrin sakitləşməsi üçün ən yaxşı üsuldur. Bundan əlavə yaşamın ilk dönəmlərində körpə yalnız süd daha sonra yumşaq qidalarla bəsləndiyi üçün əmmə reflekslərinin güclənməsi üçün də gərəkli hesab edilir.

Aztibb.az xəbər verir ki, pediatr Xəyalə Əliyevanın sözlərinə görə, körpələr yatarkən onlara əmzik vermək ani uşaq ölümləri riskini azaldır. Bundan əlavə rahat yuxuya getməsinə kömək olur.

Lakin qəbul etmək lazımdır ki, dişlərin çıxmağa başlamasından sonra əmzik istifadəsini azaltmaq mütləqdir. Bu uşağın damaq inkişafında ləngiməyə, dişlərin əyilməsinə və dişləmə keyfiyyətinin azalmasına səbəb ola bilər. Buna görə də əmziyin bir müddət sonra vərdiş halına gəlməsinin qarşısını zamanında almaq lazımdır.

Bundan əlavə, əmziyi uşağın ağzına verməmişdən qabaq onu isti suyla yuyun. Bir çox valideynlər çox böyük səhv edirlər ki, əmzik məsələn yerə düşürsə, götürüb valideyn öz ağzına salıb, sonra uşağın ağzına verir. Böyük adamın ağzında olan bakteriyalar uşağın ağzında yoxdur. Əgər bu bakteriyalar əmziklə birlikdə uşağın ağzına gedərsə çox böyük fəsadlar törədə bilər. Ona görə də düşünülməmiş hərəkət etməyin, balaca möcüzənizin sağlamlağına qarşı diqqətli olun.