Hamiləlik dövründə ana bətnində böyüyən körpənin inkişafı üçün zəruri olan karbohidratlar, yağlar, zülallar, vitaminlər və mineralları balanslı qidalanma ilə qəbul etmək və bol su istehlak etmək vacibdir.

Aztibb.az xəbər verir ki, ginekoloq Tuğraxanım Alınağıyeva bununla bağlı "Instagram" səhifəsində məlumat paylaşıb.

Uzunmüddətli aclıq ananın qanında şəkərin azalmasına, insulinin artmasına, qanda olan yağ turşularının enerji üçün istifadəsi nəticəsində keton cisimlərinin artmasına səbəb olur.

Uzun müddət susuzluq bədənin su-duz balansının pozulmasına, böyrəklərə qan axınının azalmasına və sidik ifrazının azalmasına səbəb olur.

Bütün bunlar anada zəiflik, yorğunluq, baş ağrısı, aşağı təzyiq və bayılmaya səbəb ola bilər.

Nəticədə, körpənin rifahının göstəricisi olan biofiziki profili dəyişikliklər baş verə bilir:

- körpə hərəkətlərinin azalması
- KTQ-də müxtəlif pozulmalar
- dölyanı mayenin azalması
- körpənin tənəffüs hərəkətlərinin azalması

Yüksək qan təzyiqi, hestasional diabet, böyrək xəstəliyi olan hamilə qadınlar qəti şəkildə oruc tutmamalıdır.