İnfluenza B virusları çox yoluxucudur. Bu virus insandan insana yoluxmuş xəstələr danışdıqda, asqırdıqda və ya öskürdükdə, çirklənmiş səthlərlə təmasda olduqda və əllər vasitəsilə havaya yayılan damcılarla tənəffüs yolu ilə ötürülür. Virus yoluxmuş səthlərdə 2-8 saat canlı qala bilir.

Aztibb.az xəbər verir ki, pediatr Xəyalə Əliyevanın sözlərinə görə, İnfluenza B ştamı iki-üç gün davam edən inkubasiya dövründən sonra qəfil başlayan hərarət, baş ağrısı, əzələ ağrısı ilə müşayiət olunan öskürək, boğaz ağrısı, gözlərdə yaş axması və halsızlıqla irəliləyir.

Pediatr qeyd edib ki, bu daha çox uşaqlarda rast gəlinən ifeksiya növüdür. Daha əvvəl virusla qarşılaşmadıqları üçün uşaqlarda yüksək hərarət, febril qıcolmalar, limfa düyünlərinin böyüməsi, həzm sisteminin daha çox tutulması (ürəkbulanma, qusma, ishal) və daha az tənəffüs sisteminin təzahürləri (quru öskürək, burun axması, boğazda yanma) müşahidə edilə bilər.

“Xəstələnməmək üçün əllərin yuyulması, maskalardan istifadə, insanların çox olduğu yerlərdən qaçınmaq lazımdır. Xəstə olanlar üçün isə evdə dincəlmək, öskürərkən və asqırarkən ağız və burnu birdəfəlik salfetlə örtmək və əllərin tez-tez yuyulması məsləhətdir”, – həkim tövsiyə edib.

Həkim bildirib ki, peyvənd infeksiyadan qorunmağın ən təsirli yoludur.