Öncə sakitliyini qorumaq və panikaya qapılmamaq lazımdır. Bu, xəstənin rahat olması və təhlükəsiz müalicə olunması üçün vacibdir.

Aztibb.az xəbər verir ki, nevroloq Fəridə Muradovanın sözlərinə görə, qıcolma keçirən şəxsin ətrafı təhlükəsiz edilməlidir: “Mümkünsə, xəstəni düz bir səthə qoyun və ətrafındakı hər hansı iti və ya sərt əşyaları çıxarın. Sonra xəstənin başını yüngülcə yana çevirin. Bu, ağızdan çıxan tüpürcək və digər mayelərin boğulmaya səbəb olmasının qarşısını alır”.

Həkim qeyd edib ki, əgər xəstə qıcolma keçirərkən ağız və ya burundan maye çıxırsa, onu parça və ya salfetlə təmizləyin. Həmçinin xəstənin rahatlamasına kömək etmək üçün işıqları söndürün və səs-küyü minimuma endirin. Qıcolma uzun müddət davam edərsə və ya şəxs nəfəs almaqda çətinlik çəkirsə, təcili yardım çağırın və ya xəstəni ən yaxın tibb müəssisəsinə aparın.

Əlavə edib ki, tutmadan sonra xəstəni rahatladın və dəstək verin. Lazım gələrsə, bir stəkan su verin, istirahət etməsinə şərait yaradın.

“Epileptik tutmalar müxtəlif yollarla baş verir və hər biri fərqli müalicə tələb edə bilər. Buna görə də, qıcolma keçirən şəxsə qarşı hər hansı bir hərəkətə keçməzdən əvvəl həkimə müraciət etmək tövsiyə olunur”, – həkim bildirib.