Diabet xəstələrinin oruc tuta bilmək imkanları bir sıra faktorlardan asılıdır.

Aztibb.az xəbər verir ki, bununla bağlı endokrinoloq Rəhilə Mansur "Instagram" səhifəsində məlumat paylaşıb.

Hansı diabetlilər oruc tuta bilməzlər?

Aclıq qan şəkəri 300 mg/dL üzərində olanlar;
3 aylıq qan şəkəri (HbA1C )10%-dən çox olanlar;
İnsulin istifadə edənlər;
Sulfanilüre preparatları qəbul edənlər(Amaryl,Diabeton,Mepril və s.);
Yanaşı ürək-damar xəstəliyi olanlar;
Diabetə bağlı böyrək,göz,sinir ağırlaşmaları olanlar;
Hamiləlik diabeti olanlar;
Son 3 ayda hipoqlisemik atak(ani qan şəkəri düşməsi) keçirənlər;
Yaşı 75-dən yuxarı olan diabetlilər;

Oruc tutan diabetlilər necə qidalanmalıdırlar?

Həkim bildirib ki, sahurda zülal və lif ağırlı qidalardan – yumurta, pendir, zeytun, tərəvəz, buğda və ya çovdar çörəyi, bir stəkan süd və ya ayran, bir ədəd meyvə istifadə olunmalıdır.

“İftarda bol tərəvəz salatı və ət yeməklərinə üstünlük verilməlidir.İftar və sahur yeməyi arasında gün boyu istifadə edə bilmədiyiniz qoz, badan, fındıq, süd, qatıq kimi qidalara yer verə bilərsiniz və bol maye qəbul etməyi unutmamalısınız. Eyni zamanda, oruc tutan diabetlilərin evdə tez-tez qan şəkəri ölçmələri tövsiyə olunur”, – həkim bildirib.