Disfoniya səsin formalaşmasının pozulmasıdır. Bu zaman səsin keyfiyyəti, yəni tonu, gücü, tembri pozulur və aşağı, zəif, bir qədər boğuq və s. olur. Mərkəzi və ya periferik mənşəli üzvi və ya funksional pozğunluqlar nəticəsində baş verir. Yalnız pıçıltılı nitqin qorunub saxlanıla biləcəyi səsin tam olmaması afoniya adlanır.

Aztibb.az xəbər verir ki, defektoloq-loqoped Xatirə Mikayılova disfoniyanın səbəblərini sadalayıb.

Həkim bildirib ki, travmatik beyin zədəsi, boyunda cərrahi əməliyyatların nəticələri, onkoloji xəstəliklər, yoluxucu xəstəliklər nəticəsində yaranan ağırlaşmalar, səs aparatına həddindən artıq yük, insult və digər səbəblər disfonyaya yol açır.

O, səsin gücündə dəyişikliyi (zəif, sakit, pıçıltı, artan səs), səs tembrinin dəyişməsini (boğuq, küt, kar, boğuq, gərgin), səs tonunun dəyişməsini (monoton), fit və səs-küylü danışmanı (oxumaq) xəstəliyin əlamətləri olaraq sadalayıb.

Disfoniyada səs funksiyasını bərpa etmək mümkündürmü?

Mütəxəssisin bildirdiyinə görə, səs funksiyasını bərpa etmək üçün loqopedin köməyi lazımdır. Diaqnostik müayinə zamanı mütəxəssis səs əmələ gətirmə fəaliyyətinin hansı aspektlərinin pozulduğunu müəyyən edir. Fərdi bərpa proqramını tərtib edir. Tənəffüs məşqləri, nitq və səs məşqləri, loqopedik masaj da daxil olmaqla fərdi məşğələlər keçirilir. Lazım gələrsə nevroloq, psixoterapevtə göndərilir.