Oruc tutmaq hər bir müsəlmanın borcu olmaqla yanaşı, sağlamlıq baxımından insanın gündəlik qəbul etdiyi kalori miqdarını azaltmağa xidmət etməlidir. Lakin təəssüf ki, çox vaxt bu belə olmur.

Çox vaxt səhər yuxudan durmağa tənbəllik edilir, iftarda isə həddindən çox qida qəbul olunur. Buna görə də orucu daha sağlam tutmaq üçün mütəxəssislər orqanizmi hazırlamağı və qida tərkibini dəyişməyi məsləhət görürlər.

Aztibb.az sağlamlıq mütəxəssislərin bununla bağlı araşdırmlarına istinadən xəbər verir ki, oruc tutan kəs hər gün səkkiz stəkan su içməlidir. Suya çiyələk, alma, limon, nanə də əlavə etmək olar.

Hər səhər mütləq yemək yeyin. Səhər yeməyində yağı az olan pendir, soyutma yumurta yeməyə və tərkibində suyun miqdarı çox olan tərəvəzlərə, məsələn, pomidor, bibər, xiyara üstünlük verməyə çalışın.

Axşam menyusunun şorba, tərəvəz, qatıq və çörəyin olması məsləhətdir.

Yatmazdan 3 saat əvvəl qida qəbulunu dayandırın. Buna əməl etsəniz, iftardan sonra da yemək vərdişiniz olmayacaq və daha rahat mədə ilə oruc tutacaqsınız.

Çay və kofeni azaldın. Çünki çay və ya kofe orqanizmin suyunu azaldır.

Hər gün 45-60 dəqiqə yerimək orqanizminizin müqavimətini artıracaq və özünüzü daha güclü və gümrah hiss edəcəksiniz. Ramazan ayında da hər gün piyada yol getməyə davam edin. İftardan 2 saat sonra ən azı yarım saatlıq gəzinti orqanizm üçün xeyirlidir.

Allah oruc və dualarınızı qəbul etsin!