Bağırsaq keçməzliyi, bağırsaqların bu, yaxud digər səviyyəsində kənar edilə bilməyən maneə ilə onun içindəkilərin irəliləməsini pozaraq əmələ gəlir.

Aztibb.az xəbər verir ki, ümumi cərrah Toğrul Məhərrəmovun bununla bağlı verdiyi məlumata görə, ən çox təsadüf edilən bağırsaq keçməzliyinin əlamətlərindən qarın nahiyəsində bərk tutma şəkilli ağrıları qeyd etmək olar.

“Stranqulyasion keçilməzliyində ağrılar daimi olub, tutma şəkilli xarakter daşıyaraq, qəflətən başlayır. Ağrıların dözülməz səviyyəsində qarında "tərpənməni" müşahidə etmək olar. Obturasion keçməzliyində ağrılar elə intensiv olmayaraq, tədricən inkişaf edir”, – həkim bildirib.

Həkim qeyd edib ki, xəstələrdə çox vaxt qusma olur. Ən əvvəl qusuntu kütləsində qida qalıqları, sonralar isə qusuntu öd tərkibli olur (çirkli sarı rəngli, nəcis qoxulu maye). Bağırsaqlardan yellərin (bağırsaqdan çıxan yel), nəcisin və ifrazatın çıxmasının dayanması ən vacib əlamətlərdəndir. Sonralar qarın nahiyəsində köpmə inkişaf edir və tez bir zamanda xəstənin ümumi vəziyyəti pisləşir, ağız nahiyəsi və dili quruyur, taxikardiya qeyd edilir.

Mütəxəssislər bildirir ki, kəskin mexaniki bağırsaq keçməzliyi əməliyyata göstərişdir.