Bəzi yoluxucu xəstəliklər sahibinə ev heyvanlarından keçə bilər, buna görə də özünüzü qorumaq üçün ehtiyat tədbirləri görülməlidir.

Aztibb.az lenta.ru-ya istinadən xəbər verir ki, , infeksion xəstəliklər üzrə mütəxəssis Tatyana Sergeyevanın sözlərinə görə, insanlara ev heyvanlarından toksoplazmoz, quduzluq, göbələk dəri zədələri, psittakoz, helmint invaziyaları, leptospiroz kimi xəstəliklər keçə bilər. Lakin onların bəziləri heyvanlar və insanlar üçün eyni dərəcədə təhlükəlidir.

Həkim bildirib ki, tutuquşular, qarğalar, göyərçinlər üçün təhlükəli olan ornitoz tez-tez quşun ölümünə və sahibinin ağır pnevmoniyasına səbəb olur. Leptospiroz isə insanlarda böyrək və qaraciyərə ciddi ziyan vurur.

Profilaktik tədbir olaraq, ev heyvanlarını mütəmadi baytar nəzarətindən keçirmək və vaxtında peyvənd etmək məsləhətdir.

Həmçinin infeksionist pişik və itləri öpməməyi tövsiyə edib, onlara yemək masasına qalxmaq, çarpayıda uşaqlarla yatmaq olmaz.

Şəxsi gigiyenaya riayət edilməli, ev heyvanlarına toxunduqdan sonra əllər yuyulmalıdır.

“Uşaqlar evə tarla siçanlarını, digər vəhşi heyvanları gətirməyi sevirlər. Buna qətiyyən icazə verməyin! Gəmiricilər ciddi xəstəliklərin daşıyıcısı ola bilər - yersinioz, böyrək sindromlu hemorragik qızdırma vəs.”, – həkim bildirib.