Dispepsiya funksional həzmsizlik deməkdir. Funksional həzmsizlik heç bir üzvi pozğunluğun və ya xəstəliyin olmadığı, ancaq funksional problemlərdən qaynaqlanan bir vəziyyətdir.

Aztibb.az xəbər verir ki, qastrenteroloq-hepatoloq Mahirə Qədirovanın sözlərinə görə, funksional həzmsizlikdə ən çox görülən şikayətlər yeməklə bağlı şişkinlik və ürəkbulanmadır. Bu şikayətlər çox vaxt müalicəyə müqavimət göstərir.

Həkim qeyd edib ki, bu hal hər 4 nəfərdən birində olur. Qadınlarda kişilərə nisbətən bir az daha çox rast gəlinir. Uşaqlarda daha az olur, yeniyetməlikdə rastgəlmə artır.

Hansı şikayətlərə səbəb olur?

Ən çox şişkinlik, erkən doyma, yeməkdən sonra və ya yemək zamanı qarında gərginliyə, ağrıya səbəb olur. Ağrı tez-tez qarın və ya mədənin yuxarı yarısında görülür. Yüngül sinə yanması və reflü birlikdə və ya tək baş verə bilər.