Adenoid uşaqlarda valdeyerin limfa halqası dediyimiz limfa sisteminin bir hissəsidir.

Aztibb.az xəbər verir ki, pediatr Atlaz Möhsümovanın "Instagram" səhifəsində bununla bağlı paylaşdığı məlumata görə valdeyerin limfa halqası orta hesabla 8 yaşa qədər böyüməyə davam edir və sonra kiçilməyə başlayır. Bu səbəbdən 8 yaşından etibarən adenoid əməliyyatına ehtiyac azalacaq. Lakin adenoidin kiçilməsi bəzən 17-18 yaşa qədər gecikə bilər.

Həkim qeyd edib ki, adenoid doğuşdan böyüyür. Adətən 4-5 yaşında pik həddə çatır: “Bu, adenoid əməliyyatının ən çox edildiyi yaşlardır. Yenə də bu yaşda uşaqlar bağça yaşı olduğundan infeksiyalara rast gəlməyə başlayırlar. İnfeksiyalar adenoidin böyüməsinə səbəb olur”.

“Adenoid əməliyyatının hansı yaşda edilməsi sual olunarsa, orta hesabla 3-6 yaşda edilməsi məsləhətdir. Ancaq şiddətli apnoe və xoruldama başlayanda uşaq tez əməliyyat oluna bilər. Həyatın ilk 6 ayından etibarən əməliyyat edilə bilər. Ancaq adenoidlərin belə erkən yaşda böyüməsi çox nadirdir”, – həkim bildirib.