Ailə həkimi seçmək meyarları həkimin tibb təhsilindən, etibarlı və profesional mütəxəssis olmasından çox asılıdır.

Aztibb.az xəbər verir ki, həkimin təcrübə müddəti, reputasiyası, xəstələrin həkim haqqında rəyi, iş yeri həkim seçimi zamanı ilk diqqət ediləsi məqamlardır.

Həkim-terapevt Nərminə Abbasova ailə həkiminin fəaliyyət istiqamətləri ilə bağlı danışarkən bildirib ki, ailə həkimi sağlamlıqla bağlı bütün problemlərin həllində iştirak edir, müəyyən müddətdən sonra ailənin bir üzvü kimi olur.

Qeyd edib ki, ailə həkimi ailədə olan vərdişlərdən, genetikada olan problemlərdən xəbərdar olduğundan vaxtında profilaktik tədbirlər görə bilir. Həmçinin həmin ailənin düzgün qidalanmasına yardımçı olur. Bu da öz növbəsində qidalanma ilə sıx şəkildə bağlı olan xəstəliklərin azalmasında özünü büruzə verir.

“Ailə həkimi pasiyentinin keçirdiyi bütün xəstəliklərdən xəbərdar olur, bu isə insana hansısa bir müalicəni tətbiq etməyin düzgün olub-olmamasını müəyyən etmək imkanını verir. Ailə həkimi ailə üzvləri ilə yaxın olduğundan bu ailədəki münasibətlərə də yaxşı bələd olur. Bu xüsusiyyət onun ailənin psixoloqu rolunda da çıxış etməsinə kömək edir”, – həkim bildirib.