Amerika Kardioloqlar Assosiasiyasının alimləri müəyyən ediblər ki, keyfiyyətli yuxu insana daha asan pəhriz saxlamağa, eləcə də daha asan idman etməyə kömək edə bilər.

Aztibb.az bu barədə məlumatı heart.org portalına istinadən verir. 

Tədqiqata 125 nəfər iştirakçısı cəlb olunub. Onların orta yaş həddi 50 olub və 91 faizini qadınlar təşkil edib. Heç kimə ciddi tibbi vəziyyət diaqnozu qoyulmayıb, lakin bütün iştirakçılar obez və ya artıq çəkidən əziyyət çəkənlər olub.

Tədqiqatın müəllifləri iştirakçılar üçün arıqlamağa yönəlmiş xüsusi proqrama başlayıblar və əlavə olaraq onlar yuxunun keyfiyyətinə nəzarət ediblər. İştirakçılarla üç dəfə xüsusi sorğu keçirilib – proqramın əvvəlində, altı ay və bir ildən sonra. Tədqiqat müddətində iştirakçılar yuxu gündəliyi tutublar və onların istirahət, oyaqlıq və yuxu vəziyyətlərini qeyd edən xüsusi bilərzik taxıblar. 

Nəticələr göstərib ki, yuxu nə qədər yaxşı olarsa, iştirakçılar bir o qədər tez-tez kalori normalarına əməl edir, terapiyaya qatılır və fiziki fəaliyyətə daha çox vaxt ayırırlar.