A, C, E vitaminləri və minerallarla zəngin qidalar görmə qabiliyyətini yaxşılaşdıra və göz xəstəliklərinin inkişafının qarşısını ala bilər.  

Aztibb.az iz.ru-ya istinadən xəbər verir ki, bu barədə dietoloq Anastasiya Yefimova məlumat verib. 

Mütəxəssis həmçinin sink və Omeqa-3 yağ turşularının faydalılığını qeyd edib ki, bu da insanda katarakta əmələ gəlməsi riskini azalda bilər. O, bu maddələrin həbdən deyil, qidadan alınmasının vacib olduğunu vurğulayıb.

“A vitamini ilə zəngin qidalara yerkökü, ərik, qovun, manqo, bolqar bibəri, ispanaq, şirin kartof daxildir. Tərkibində lutein, zeaksantin olan məhsullara da diqqət yetirməlisiniz. Bunlar brokoli və digər kələm növləri, qarğıdalı, yumurta, nektarin, portağal, ispanaq, balqabaqdır”, - deyə A.Yefimova bildirib.

Ekspertin sözlərinə görə, sink qırmızı ət, quş əti, lobya, noxud və qoz-fındıqda olur. Omeqa-3 isə kətan toxumunda, kətan yağında, həmçinin soyuq dəniz balıqlarında və qozda olur.

Həkim həmçinin tərkibində C vitamini olan brokoli, meyvə, bolqar bibəri, pomidor və çiyələk yeməyi təklif edib. E vitamini qoz-fındıq, taxıl və yaşıl tərəvəzlərdə ola bilər, deyə mütəxəssis bildirib.

Eyni zamanda, həkim ümumiyyətlə gündə ən azı beş porsiya tərəvəz və meyvə yeməyə çalışmağı, həmçinin pəhrizə müxtəlif yağlar, toxumlar və balıqlar daxil etməyi tövsiyə edib.

Dietoloq əlavə edib ki, beyin funksiyasını yaxşılaşdırmaq üçün D vitamini, lif və maqneziumla zəngin qidaları pəhrizə daxil etməyə dəyər, çünki onlar depressiya, kəskin psixoz və narahatlıq kimi hər cür psixi pozğunluqlardan qoruyur.