Bypass əməliyyatının tətbiq olunduğu damara görə adı dəyişir. Həmçinin əməliyyatın icra olunduğu nahiyəyə görə texnikası da fərqlidir.

Aztibb.az-ın məlumatına görə, Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev bildirib ki, ayaqda bud (femoral) arteriya tıxanıqlığı olarsa, qasıqdan diz sahəsindəki açıq olan popliteal arteriyaya “femoro-popliteal bypass” əməliyyat icra olunur. Onun sözlərinə görə, femoro popliteal bypass dizin altından və ya üstündən girilərək tıxalı arteriyaları müalicə etmək üçün istifadə edilən cərrahi bir əməliyyatdır.

Uzman həkim qeyd edib ki, əməliyyat ümumi, yaxud epidural anesteziya ilə həyata keçirilə bilər: 

"Əgər qarındakı iliak (ayaqların ana damarı), yaxud aorta damarlarının tıxanıqlığı səbəbi ilə icra ediləcək əməliyyat risklidirsə, qarını açmadan açıq olan qasıqdan tıxanıqlığın daha aşağısındakı digər qasığa süni damar istifadə edərək Femorofemoral bypass həyata keçirilir".

Cabir Gülmalıyev bildirib ki, femoral popliteal bypass əməliyyatı əsasən gündəlik işlərin tamamlanmasını məhdudlaşdıran və daha ağır simptomlara səbəb olan femoral arteriya tıxanıqlığı hallarının müalicəsində istifadə olunur.