Qlüten taxıl bitkilərinin toxumlarında, xüsusilə buğda, arpa və çovdarda olur. 

Aztibb.az “Rossiyskaya qazeta”ya istinadən xəbər verir ki, əgər dənli bitkilərdə olan qlütenə qarşı həssaslıq varsa, orqanizm buna xarici agent kimi reaksiya verir və ona hücum etməyə başlayır. 

“Tədricən iltihab immunitet reaksiyasının mexanizminə görə inkişaf edir, tez-tez xəstələnirik, dəri problemləri yaranır”,– deyə molekulyar bioloq Valeri Polunovski bildirib. 

Alimin sözlərinə görə, qlütenə qarşı həssas olan insanlarda çölyak xəstəliyinə tutulma riski yüksəkdir. Bu xəstəlik nazik bağırsağın selikli qişasının fəaliyyətini pozan qlüten proteininə qarşı həssaslıqla əlaqəli xəstəlikdir. Çölyak xəstəliyi qarın ağrısı, ishal və kilo itkisinə səbəb olur. Həmçinin, qida maddələrinin zəif udulması səbəbindən mineral maddələr mübadiləsinin pozulması, hipovitaminoz və anemiya inkişaf edə bilər. 

"Hazırda bu xəstəliyin xüsusi müalicəsi yoxdur, lakin tərkibində qlüten olan qidalar pəhrizdən çıxarıldıqda bütün simptomlar yox ola bilər", - V.Polunovski əlavə edib. 

Həkimlər erkən müayinədən keçməyi məsləhət görürlər.