Zəlzələ bölgəsində yaşayış tərzi, qidalanma, gigiyena, stress və digər narahatlıqlar həm ana, həm də körpə üzərində müxtəlif sağlamlıq problemlərinə səbəb ola bilər.
Aztibb.az ensonhaber.com-a istinadən xəbər verir ki, ginekoloq Dr. Pınar Gökova doğuş gözləyən anaların diqqət etməli olduğu şeylər haqqında məlumat verib.
Həkim bildirib ki, qidaların saxlanma şəraiti nəzərə alınmalı və son istifadə tarixlərinə baxılaraq istehlak edilməlidir. Zəlzələ bölgəsində təmiz suya çıxış böyük əhəmiyyət kəsb edir. Saxlama şəraitinin əhəmiyyəti içməli su üçün də keçərlidir, günəş işığından uzaq, hündür yerdə saxlanmalıdır. Yaxşı saxlanılan qablaşdırılmış su istisna olmaqla, açıq yerdə qalan su heç vaxt içilməməlidir.
Kifayət qədər qidalanmamaq, su içməmək və qida əlavələri çatışmazlığı problemləri körpədə inkişaf geriliyinə səbəb ola bilər. Hamiləlik dövründə vitaminlər, minerallar, fol turşusu və dəmir kimi əlavələrdən mütəmadi olaraq istifadə edilməlidir. Zəlzələdən sonrakı dövrdə gələcək anaların qida əlavələri əldə etməsində problemlər yarana bilər. Bu səbəbdən zəlzələ bölgəsində olan tibb işçiləri ilə əlaqə saxlanılmalı və qida əlavələrinin tədarükü üçün dəstək alınmalıdır.
P.Gökova hamiləlik dövründə gözləyən anaların yaşadığı travma sonrası stressin uzun müddətli təsirlərini açıqlayıb: “Gələcək ananın psixoloji dəstək alması son dərəcə əhəmiyyətlidir. Bir çox araşdırmalar hamiləlik zamanı gələcək anaların yaşadığı travma sonrası stress pozğunluğunun körpənin sonrakı illərində, xüsusən də yeniyetməlik dövründə depressiya, narahatlıq və hiperaktivlik pozğunluğu əlamətlərinə təsir edə biləcəyini göstərib.
Ana namizədlər zəlzələdən sonra gigiyenaya daha çox diqqət yetirməlidirlər. Gigiyena problemləri kəskin vaginal infeksiyalara və sidik yollarının infeksiyalarına səbəb ola bilər. Ona görə də gigiyena vasitələrinin təchizatı çox vacibdir. Hamiləlik əvvəlindən sonuna qədər həkim nəzarəti tələb edən bir prosesdir. Zəlzələ bölgəsində gözləyən analar üçün bu prosesdə həkim nəzarəti gecikə bilər. Hamiləliyin təqibini kəsməmək üçün ən qısa müddətdə həkimə müraciət etmək lazımdır. Gələcək anaların müntəzəm istifadə etməli olduğu dərmanlar varsa, onların tibb işçilərindən istəmələri vacibdir.
