Bu xəstəlik dirsəyə qədər uzanan qol sümüyünün alt ucunun xarici tərəfinə (lateral epikondil) birləşən biləyi qaldıran əzələlərin vətərlərinin xroniki degenerasiyasıdır. 

Aztibb.az cnnturk.com-a istinadən xəbər verir ki, reabilitasiya mütəxəssisi Dr. Berrin Akpınarın bildirdiyinə görə xəstəliyin bu adı almasının səbəbi ən çox tenis oynayan insanlarda görülməsidir. Adətən tenisçilər tenis oynayarkən raketdən biləklərini zorlayaraq istifadə edir.  

Həkim bu xəstəliyin tenis oynayanlar xaricində ağır nəyisə qaldırma, ovucu yuxarı çevirmə və yumruğunu sıxma hərəkətləri edənlərdə görüldüyünü, xüsusilə orta yaşlı insanlarda rastlandığını deyib.

O, tenisçi dirsəkdən qorunma üsullarını belə ümumiləşdirib:

“Həddindən artıq və təkrarlanan dirsək və əl bilək hərəkətlərindən çəkinmək lazımdır. Fəaliyyətdən əvvəl müəyyən isinmə hərəkətləri edilməlidir. 

Paltarın sıxılması, şüşənin silinməsi, bankanın açılması və s. bu kimi məişət işləri dincəlməklə, məsələn, hər saatda 15 dəqiqəlik fasilə verməklə edilməlidir. Həmçinin şikayətə səbəb olacaq fəaliyyətləri məhdudlaşdırmaq və ya dəyişdirmək lazımdır. İstirahət və fəaliyyətdən sonra soyuq tətbiq oluna bilər. 

Bundan əlavə, kriyoterapiya deyilən üsulla həm ağrıları azaltmaq, həm də iltihabı sakitləşdirmək olar ki, bunun həm müalicəvi, həm də rahatlaşdırıcı təsiri var.