İndiki gəncliyi "selfi nəsli" adlandırırlar, bəziləri gündə bir neçə foto çəkir. Bu vəsvəsəni nə izah edir? Sualın cavabını Böyük Britaniya alimləri tapıblar. 

Hər hansı bir sosial şəbəkəni açsanız, gördüyünüz fotoşəkillərin əksəriyyəti çox güman ki, selfi olacaq. Çoxlu bəyənmə qazanmaq istəyi ilə fotonu çəkmək üçün bəziləri hətta öz həyatlarını riskə atmağa da hazırdırlar. 

Aztibb.az doctorpiter.ru-ya istinadən xəbər verir ki, Suonsi Universitetinin alimləri hər gün selfi çəkən və sosial şəbəkələrdə fotolar yerləşdirən qadınlarla bağlı tədqiqat aparıblar. Seçim onunla əsaslandırılır ki, ən çox öz şəkillərini çəkməyi xoşlayan zərif cinsin nümayəndələridir. 

Tədqiqatçılar 150 qadının selfisini təhlil ediblər, fotoşəkilləri, onların üz ifadələrini, sosial şəbəkələrdə paylaşılma sayını və s.  

Tədqiqat “Personality and Individual Differences” jurnalında dərc edilib. Alimlərin əsas qənaəti belə olub ki, qadın nə qədər tez-tez selfi çəkib paylaşırsa, cəmiyyətə qarşı aqressivliyi və özünü göstərmək istəyi də bir o qədər güclü olur.  

Tədqiqatçılar həmçinin müəyyən ediblər ki, qadın real həyatda özünün nə qədər güclü və təhlükəli olduğunu göstərməyə çalışırsa, bir o qədər də aktiv şəkildə selfi çəkir. Üstəlik, bunu konkret olaraq kişilərə və ya digər qadınlara deyil, ümumilikdə hər kəsə sübut etmək istəyir. 

Professor Fil Rid bildirib ki, qadınlar həmçinin cəmiyyətə hakim olmaq və kimin partnyor olacağını özləri seçmək istədiklərini göstərirlər. Qadınlar bu davranışı ilə sübut etməyə çalışırlar ki, onlar passiv olmaq və kişilərə tabe olmaq istəmirlər, bunun təbiət tərəfindən proqramlaşdırıldığı stereotipini guya qırırlar.  

Kişilərə gəlincə, alimlər onların selfiyə olan sevgisi ilə aqressiyalarını cəmiyyətə göstərmək istəyi arasında heç bir əlaqə aşkar etməyiblər.