Həkim-mikrobioloq Oğuz Özyaral zəlzələ bölgəsində nəzərə alınması mühüm olan gigiyena qaydalarını sadalayıb. Həkim bölgəyə başlıca olaraq su, sabun və daşınan tualetlərin göndərilməsinin əhəmiyyətinə diqqət çəkib. 

Aztibb.az cumhuriyet.com.tr-yə istinadən xəbər verir ki, həkimin sözlərinə görə belə bölgələrdə dağıntılar altında qalan insan, heyvan cəsədləri, tullantılar və kanalizasiya sistemlərinə nəzarət çətinləşir. 

Bölgədə içməli suyun xlorlanması çox vacibdir. İnsanlara və ev heyvanlarına qablaşdırılmış suyun verilməsi çirklənmənin qarşısının alınması baxımından son dərəcə əhəmiyyətlidir. 

Mobil, daşınan tualetlər dərhal yerləşdirilməlidir. Növbə yarana bilər, insanlar ətrafda təbii ehtiyaclarını ödəməyə məcbur qalarlar. Nəticədə xəstəlik törədiciləri çoxala bilər. 

Bölgədəki açıq sulara da nəzarət edilməlidir. Ən təhlükəli vəziyyət içməli suyun kanalizasiya tullantıları ilə çirklənməsidir. 

Digər yanaşma ondan ibarətdir ki, bölgədə antiseptik və dezinfeksiyaedici vasitələrə böyük ehtiyac yaranır. Tetanozla qarşılaşacaq bir vəziyyət ola bilər, dərhal bölgədə peyvəndin gücləndirilməsi lazımdır. 

Dağıntı olan bölgədə xilasedicilər mümkün qədər maskadan istifadə etməlidir. Toz daxildə mikrob çirklənməsi və ağciyərlərdə infeksiya yarada bilər. 

Salmonella, tif xəstəliyi, virus və vəba kimi infeksiyaların yayılmasının qarşısının alınması üçün yuyunma öncəsi suya kalium permanqanat həbləri qoyulmalı, müəyyən müddət gözlədikdən sonra əllər dezinfeksiya edilməlidir. 

Həkim əlavə edib ki, vaxtaşırı vətəndaşlara C vitamininin verilməsi də vacibdir.