Yeni bir araşdırma, burun isti olanda immunitet sisteminin burundakı viruslarla mübarizədə daha müvəffəqiyyətli olduğunu ortaya qoydu. 

“Journal of Allergy and Clinical Immunology” jurnalında dərc edilən bir araşdırma, temperaturun aşağı düşməsi ilə burundakı müdafiə mexanizmlərinin azaldığını aşkar edib. 

Aztibb.az euronews.com-a istinadən xəbər verir ki, 2018-ci ildə aparılan bir araşdırma, burun hüceyrələrinin tənəffüs yolu ilə bakteriyaları məhv edən xüsusi maddə ifraz etdiyini müəyyən edib. Bu maddə bədənə daxil olmağa çalışan bakteriyaların qarşısını alır və onları öldürən mexanizmlər kimi təsvir edilir. 

Yeni tədqiqatın başlanğıc nöqtəsi bu iki sual idi: Burunda virus infeksiyası zamanı həmin maddə də ifraz olunurmu? Əgər ifraz olunursa, reaksiyası gücü temperaturla bağlıdırmı? 

İlk suala cavab vermək üçün tədqiqatçılar könüllülərdən nümunə əldə ediblər. Məlum olub ki, selikli qişa virusları hədəfə almaq üçün xüsusi maddə əmələ gətirir. 

İkinci suala cavab üçün burun hüceyrəsi nümunələrini iki qrupa bölüblər və onları laboratoriyada becəriblər. Birinci qrupu 37°C, digərini isə 32°C temperatura məruz qoyublar. 

Nəticələrə görə, həmin xüsusi maddə normal bədən istiliyi 37°C altında viruslarla uğurla mübarizə apara bilib. Digər tərəfdən, 32°C -yə məruz qalan hüceyrələr daha az xüsusi maddə ifraz edib və bu da viruslara qarşı daha az təsirli olub.