Alma sirkəsinin FAYDALARI

28.05.2021 21:22

Sirkələrdən tərkibinə görə ən yaxşısı alma sirkəsidir.

Aztibb.az xəbər verir ki, bu barədə həkim-fitoterapevt Fizuli Hüseynov bildirib. Həkim qeyd edib ki, qandakı şəkər və insulinin miqdarını normada saxlamaq üçün gündə 1 xörək qaşığı sirkəni 1 stəkan suya qarışdırıb içmək lazımdır, amma mədə problemi olanlar ondan istifadə etməməlidir. Yaxud 1 çay qaşığı sirkə 1 stəkan suya qarışdırıb yeməkdən sonra gündə 2-3 dəfə içilə bilər.

Fizuli Hüseynovun bildirdiyinə görə, saçlardakı kəpəyi, saç diblərindəki qaşıntı və səpgiləri götürmək üçün 2 xörək qaşığı sirkəni 1 stəkan su ilə qarışdırın və saçları yuyanandan sonra diblərini həmin məhlulla isladın.

Alma sirkəsi ilə göbələk olan yerlər gündə iki dəfə silinsə, göbələk xəstəliyindən azad olarsınız.

1 xörək qaşığı alma sirkəsinin 1 stəkan su ilə qarışımı həm yüksək xolesterini aşağı salır, həm də arıqlamağa kğmək edir. Bu qarışım iştahanı azaldır. Qarın yağlarını əritmək üçün bu nisbət gündə 1 stəkan olmaqla 3 ay içilməlidir.

Onun sözlərinə görə, alma sirkəsi dərinin pH-nı normal saxlamaq üçün də əla vasitədir, ona görə də üz səpgilərində, günəş ləkələrində, diatezlərdə su ilə bərabər nisbətdə qarışdırılmış alma sirkəsinə pambıq batırılıb gündə iki dəfə silinir.

Tənzifi alma sirkəsində isladıb və varikozlu ayaqlara bağlayıb gündə bir dəfə 1 saat bədən səviyyəsindən hündürdə saxlasanız çıxmış damarlarınız da yavaş-yavaş düzələr.

Alma sirkəsinin evdə hazırlanma qaydası:

5 kq alma

1 stəkan təbii sirkə və ya sirkə anası (1 xörək qaşığı)

2 stəkan şəkər (bal da ola bilər)

Yarım çay qaşığı duz.

Əvvəlcə almalar yuyulur, tumu təmizlənib sürtgəcdən keçirilir (ətçəkən maşından və ya şirəçəkəndən) və yuxarıda yazılanların hamısı 4 litr filtrasiya olunmuş suya əlavə edilərək yaxşı-yaxşı qarışdırılır. Bir qazana tökülür, üstü qapaqla yox tənziflə örtülür, günəş dəyməyən, temperaturu 25 dərəcədən çox olan bir yerə qoyulur və hər gün bir dəfə qarışdırılır. Əgər sirkənin daha tez əmələ gəlməsini istəyirsinizsə, içinə qarışan alma sirkəsinin miqdarını 0.5 litrə qədər artıra bilərsiniz. Təxminən 1 aydan sonra sirkəniz hazırdır.