Ümumdünya Səhiyyə Təşkilatı (ÜST) yaxın 20 il ərzində xərçəngə tutulma hallarının 70 faiz artacağını proqnozlaşdırır. Təşkilatın hesabatına əsasən, xəstəliyə yeni tutulma hallarının 60 faizdən çoxu Afrika, Asiya, Mərkəzi və Cənubi Amerikanın payına düşür.

Aztibb.az xəbər verir ki, Beynəlxalq Xərçəng Qeydiyyatı Assosiasiyası isə bu xəstəliyin 4 növünün - ağciyər, döş, bağırsaq və prostat xərçənginin daha geniş yayıldığını bildirib. Ümumilikdə isə 100 müxtəlif xərçəng növü vardır. Qadınlarda döş, kişilərdə isə prostat vəzi xərçənginə daha sıx rast gəlinir.

Bu dəhşətli xəstəlikdən ölən uşaqların sayı daha çoxdur. Uşaqlarda müşahidə edilən şişlər əsasən embrional şişlərdir. Embrional şişlərin əmələ gəlməsinin səbəbi anaların, ataların genetik şiş daşıyıcısı olmasıdır. 

Pəhriz xərçəngdən qorunmanın əhəmiyyətli hissəsidir. Asanlıqla qarşısı alına bilən xərçənglər müəyyən davranışlarla sıx əlaqəli olanlardır. Siqaret çəkməmək, yaxud spirtli içki içməmək əsasən ağciyər, boğaz, ağız və qaraciyər xərçəngi kimi bir sıra xərçəng növlərinin yaranma riskini azaldır. Müəyyən peyvəndlər bəzi xərçəng növlərinin qarşısının alınmasında müsbət rol oynayır.

Mütəxəssislər bildirirlər ki, risk amilləri arasında əsası siqaretçəkmədir. Tədqiqata görə, piylənmə və artıq çəki problemi ilə bağlı onkoloji xəstəliklərə tutulma hallarının miqdarı bütün dünyada artır. Aşağı gəlirə malik Asiya və Afrika ölkələrində xərçəngin əsas səbəbi infeksiyadır. Daha bir risk amili isə havanın çirkləndirilməsidir.