Həkimlər insanları orucdan sonra normal bəslənmə rejiminə keçərkən diqqətli olmağa çağırırlar. Orucluqda aclığa alışan orqanizmi həddindən artıq yükləmək, xüsusilə ağır yeməklərdən istifadə etmək ürəkdə və həzm sistemində problemlər yarada bilər.
Aztibb.az xəbər verir ki, Ramazandan sonra insanda çox yemə istəyi artmağa başlayır, bu da orqanizmi artıq çəki problemi ilə üz-üzə qoyur. Diyetoloqlar çəkini artıran səbəbləri sadalayıblar. Bunlar xeyli miqdarda şəkərli çay və qəhvə içmək, unlu məmulatlardan çox istifadə, şəkər və şirni istehlakını artırmaq və s.-dir.
Artıq çəkidən yayınmaq üçün diyetoloqlar insanları qida seçimində diqqətli olmağa çağırırlar. Bayramda günorta və axşam yeməyindən imtina edilməməlidir. Naharda qızartma, sosiska, kolbasa kimi yağlı və duzlu yeməklərin qəbulundan çəkinməli, pendir, yumurta, pomidor, xiyar kimi məhsullara üstünlük verilməlidir. Günorta yeməkləri üçün şorba, ayran, salat, qatıq və tərəvəz yeməklərindən istifadə etmək lazımdır. Axşam menyusu isə sadə və yüngül olmalıdır. Yatmazdan 2 saat əvvələ qədər yemək- içmək işini bitirmək vacibdir.
İdmanı unutmamaq
Sağlam yaşamağın əsas qaydalarından biri olan fiziki məşğuliyyətdən imtina etmək olmaz. Çünki, fiziki aktivlik bağırsaq hərəkətlərini artırır, qanda-şəkəri və xolesterolu azaldır, həm də kilo itirməyə kömək olur.
“Ramazandan sonrakı günlərdə idmanla məşğul olmaq, bədən hərəkətləri etmək, yürüşə çıxmaq orqanizmi əvvəlki vəziyyətinə gətirməkdə yardımçı olar, həzm prosesini yaxşılaşdırar, kökəlmə riskini aşağı salar. 40-50 dəqiqə idmanla məşğul olmaq gün ərzində yaxşı əhval-ruhiyyədə qalmağı təmin edər, həm də sağlam vücuda sahib olmağa yardımçı olar”, – deyə mütəxəssislər bildirib.