COVID-19 xəstəliyi əleyhinə mübarizə istiqamətində insanların peyvənd edilməsi prosesi ölkəmizdə uğurla davam edir. Aprelin 2-dən başlayaraq tibb məntəqələrində sıxlığın qarşısının alınması, vaksinasiya prosesinin daha da sürətləndirilməsi məqsədilə TƏBİB tərəfindən səyyar briqadalar təşkil olunub. Bu günə qədər səyyar briqadanın ünvanına 100-dən artıq dövlət və özəl ali təhsil müəssisələrindən və başqa idarələrdən vaksinasiya ilə bağlı müraciətlər daxil olub. Son statistikaya görə, 25 mindən çox vətəndaşa 1-ci doza, 5 mindən çox vətəndaşa isə 2-çi doza məhz səyyar briqadalar vasitəsilə vurulub.

Ölkənin siyasi flaqmanı olan Yeni Azərbaycan Partiyasının təşəbbüsü ilə partiyanın gənc üzvləri könüllülük əsasında peyvənd olunub. Koronavirus infeksiyasına qarşı mübarizə məqsədilə əhalinin peyvənd olunması prosesinin yüksək keyfiyyətlə təşkil edilməsi üçün bütün zəruri tədbirlər görülür.

Bunu TƏBİB-in departament rəhbəri Aygün Əliyeva YAP gənclərinin iştirakı ilə keçirilən vaksinasiya aksiyası zamanı jurnalistlərə açıqlamasında deyib.

A.Əliyeva xatırladıb ki, ölkəmizdə vaksinasiya aksiyasına bu ilin yanvar ayının 18-dən start verilib. Vaksinasiya Strategiyasına uyğun olaraq, ilk növbədə səhiyyə işçilərinin peyvəndlənməsinə başlanılıb. Fevralın 8-dən 65 yaşdan yuxarı vətəndaşlar, fevral ayının 17-dən etibarən isə yaşı 50 və yuxarı şəxslər vaksinasiya olunublar. Martın 22-dən 40 yaşdan yuxarı, mayın 10-dan isə 18 yaşdan yuxarı insanların vaksinasiyası həyata keçirilir. TƏBİB-in əməkdaşı bildirib ki, son statistikaya görə, vurulan vaksinlərin ümumi sayı 1 milyon 800 mindən artıqdır. Belə ki, 1 milyondan çox vətəndaşımız birinci mərhələ üzrə, 800 mindən çox vətəndaşımız isə ikinci mərhələ üzrə vaksinasiya olunub.