Xorvatiyada yeni növ koronavirusa yoluxanların sayının son günlərdə artmasını nəzərə alaraq, Sloveniya qonşu ölkədən gələn şəxslərə ev karantini tətbiq edə bilər. Ölkənin baş epidemioloqu Boyana Beoviç qonşu ölkədəki vəziyyəti geniş epidemoloji dalğa kimi dəyərləndirib.
Aztibb.az xəbər verir ki, Avstriyanın ardınca Sloveniya da Xorvatiya ilə gediş-gəliş qaydalarını sərtləşdirə bilər. B.Beoviçin rəhbərlik etdiyi ekspertlər qrupu hökumətə Xorvatiyadan gələn bütün şəxsləri ev şəraitində karantinə almağı tövsiyə edib.
Baş epidemioloq bildirib ki, iyun ayının ortalarından etibarən Bosniya və Herseqovina, Serbiya və digər ölkələrdən gələn şəxslərin karantinə alınması Sloveniyadakı epidemioloji mənzərəyə əhəmiyyətli şəkildə müsbət təsir göstərib. Ona görə də, ekspert qrupu eyni nəticənin Xorvatiya ilə bağlı da əldə ediləcəyinə ümid bəsləyir.
Son günlərdə Sloveniyada yeni yoluxma hallarının bir hissəsinin (ötən həftə gündəlik 5-6 nəfər, həftə sonu isə 20 nəfərdən artıq) Xorvatiyadan idxal olunması rəsmi qurumları da narahat edir.
B.Beoviç qeyd edib ki, Sloveniya Avropada ən aşağı yoluxma statistikasına malik ölkə olsa da (indiyədək 2416 yoluxma və 129 ölüm halı), bu ölkənin səhiyyə sistemi üçün xaricdən on halın idxalı böyük problemlərə və sistemin yüklənməsinə yol aça bilər.