İynə vurulduğu sahədə selülit, abses, infiltratlara az da olsa rast gəlinir.

Aztibb.az xəbər verir ki, bu barədə fleboloq-cərrah İsmayıl Əsgərov məlumat verib.

O, bildirib ki, bu hal əsasən narkoman və şəkərli diabeti kontrolsuz olan insanlarda baş verir:

"Hər zaman dərinin antiseptiklə silinməsinə baxmayaraq, bəzən sağlam insanlarda da bu problem meydana çıxa bilər. Bu zaman yaş nekroz formalaşır. İlkin dövr müalicədə sadəcə antibiotik yetərli olsa da, sonrakı mərhələdə cərrahi müdaxiləyə - absesin drenajlanması əməliyyatına ehtiyac olur. Nicolau sindromu zamanı isə infeksiyadan sonra quru nekroz yaranır".

"İynənin ucluğunun dərinin hansısa bölgəsini qidalandıran arteriyaya düşməsi ilə onu tıxaması nəticəsində bölgə qaralır, yaxşı halda sadəcə çapıq toxuması əmələ gəlir, proses dayanır. Pis halda isə quru nekroz ocağına cərrahi əməliyyat edilməli olur", - deyə həkim qeyd edib.