Son tədqiqatlara əsasən, koronavirusun tənəffüs yolları ilə yanaşı, bütün bədən sistemlərinə, xüsusilə beyin və sinir sisteminə təsir etdiyi müəyyən edilib.

Aztibb.az medimagazin.com.tr-yə istinadən xəbər verir ki, Hatay Mustafa Kamal Universiteti Tibb fakültəsinin professoru İsmet Melek koronavirus infeksiyasının ən çox rast gəlinən nevroloji təsirinin unutqanlıq olduğunu bildirib. O, qeyd edib ki, "Amerika Nevrologiya Jurnalı"nda nəşr olunan bir araşdırmada COVID-19 infeksiyasından sonra xəstələrin 56,4 faizinin nevroloji şikayətləri olduğu göstərilib.

"COVID-19 keçiridikdən sonra əsasən unutqanlıq, baş ağrısı və nevropatiya görülür", - deyə bildirən professor əlavə edib ki, yeni nəşr olunan bir araşdırmada koronavirus xəstələrində ən çox rast gəlinən nevroloji simptomlardan birinin 31,8 faizlə yaddaş zəifliyi olduğu müəyyən edilib.

Son məlumatlara görə, COVID-19-un tənəffüs yolu hüceyrələri ilə bərabər, beyin hüceyrələrini də sevdiyini və orada yerləşərək çoxaldığını söyləyən İ.Melek onun hər 10 xəstədən birində ani unutqanlıq, yaddaş dağınıqlığı, konsentrasiyanın pozulması, danışma çətinliyi kimi simptomlarla özünü göstərdiyini deyib.

Tədqiqatlar göstərir ki, bu əlamətlər koronavirus keçirdikdən sonra aylarla davam edə bilər. Bu vəziyyətin infeksiya səbəbindən beyni qoruyan təbəqənin zəifləməsi və virusun beyni asanlıqla zəbt etməsi nəticəsində meydana gəldiyi düşünülür.