İctimai Televiziyanın operatoru Zaur Hüseynov koronavirus infeksiyası nəticəsində üç yaxınını – anasını, bacısını və bacısının həyat yoldaşını itirib. 

Aztibb.az xəbər verir ki, Z.Hüseynovun sözlərinə görə, ailənin yoluxmasına səbəb bacısının COVID-19 xəstəsi ilə maskasız görüşməsi olub: “Bacım blokda koronavirus xəstəsi ilə görüşüb. Həmin adam da, bacım da maskasız olublar. Bacım onunla da virusa yoluxdu. Təcili tibbi yardım avtomobilində xəstəxanaya çata-çatda o, vəfat etdi... Bacımın həyat yoldaşı da astma xəstəsi idi, o da bu virusdan rəhmətə getdi. Biz bacımın ölməsini anamdan gizlədirdik, heç kim də ürək eləmirdi deməyə. Axır mən gedib anamı gətirdim və dedim ki, bacım artıq bizimlə yoxdur...”

Z.Hüseynovun sözlərinə görə, 14 gün keçəndən sonra anası da öskürməyə başlayıb. 

“Tez özəl klinikada analiz verdik, anamın COVID-19 testi pozitiv çıxdı və başladıq müalicəyə. Bir gün axşam gördüm ki, anam yaxşı nəfəs almır. Həmin gün KT elətdirdik və məlum oldu ki, ciyərlərinin 50-60 faizi tutulub. Mən də virusa yoluxmuşdum, tutulma 5-10 faiz idi. Anamın saturasiyasını ölçdük, gördük 45-dir. Qandurulducu iynə vurdum, halı bir az düzəldi. Süni tənəffüs aparatına qoşdular. Aparatda 8 gün qaldı, çıxmadı...”