Türkiyədə Ramazan ayında koronavirusla əlaqədar qismən qapanmalara gediləcək.

Aztibb.az xəbər verir ki, bunu Nazirlər Kabinetinin iclasından sonra Türkiyə Prezidenti Rəcəb Tayyib Ərdoğan deyib.

“Ramazan ayının ilk iki həftəsində tədbirləri bir az da sərtləşdirərək, qismən qapanma tətbiq edəcəyik”, - deyə dövlət başçısı bildirib. 

Qismən qapanma ilə əlaqədar qəbul olunmuş qərarlar belədir:

- Həftəsonu küçəyə çıxma qadağası davam edərkən, həftəiçi küçəyə çıxma qadağası axşam 19:00-dan səhər 05:00-dək davam edəcək;

- Küçəyə çıxma qadağası saatlarında məcburi hallar istisna olmaqla, şəhərlərarası səyahətlərə icazə verilməyəcək;

- 65 yaşdan yuxarı - 18 yaşdan aşağı şəxslərin ictimai nəqliyyatdan istifadəsinə qoyulan məhdudiyyət yenidən bərpa olunur;

- Tədris imtahan ərəfəsində olan VIII və XII siniflər və məktəbəqədər təhsil müəssisələri istisna olmaqla distant formada davam edəcək;

- Kafe, qiraətxana, çay evləri və bənzər məkanlar fəaliyyətlərinə bayramdan sonrayadək fasilə verəcək;

- Yeməkxana və bənzər obyektlər Ramazan boyu çatdırılma sisteminə keçəcək;

- Xınayaxdı, toy, ümumi şura kimi iclaslar bayram sonrasına qədər təxirə salınır;

- Hotellər sadəcə öz müştəriləri ilə xidməti davam etdirəcəklər;

- Qonaqlama müəssisələri, evlərdə kütləvi iftar və bənzər fəaliyyətlər həyata keçirilməyəcək;

- Qadağaların tətbiqinə sabah axşamdan başlanılacaq.