Koronavirus pandemiyası başlayandan bəri Avropa regionunda koronavirusla əlaqədar ölüm hallarının sayı bir milyonu ötüb. Bununla da Avropa dünya regionları arasında koronavirusla əlaqədar ən çox ölüm halı qeydə alınan regiondur.

Aztibb.az xəbər verir ki, 52 ölkə və qitədən kənar ərazilərlə birlikdə Avropada ölüm hallarının sayı aprelin 10-da 1 000 288 nəfər olub. Bu barədə statistikanı AFP agentliyi dövlət qurumlarının rəsmi məlumatları əsasında hazırlayıb. Avropada indiyədək yoluxma halların sayı isə 46,5 milyona çatıb. Avropa ölkələri içərisində ölüm statistikasında ən acınacaqlı vəziyyət Böyük Britaniya (127 100), İtaliyada (114 612) və Rusiyada (103 263) müşahidə olunur.

Avropadan sonra ən yüksək ölüm halı Latın Amerikasında (832 577) və Şimali Amerikada (585 428) qeydə alınıb. Asiyada isə bu göstərici 285 824 nəfərə bərabərdir.