O, bildirib ki, stasionarda olan COVID-19 xəstələri üçün yeməklər xəstəliklərinin ağırlıq dərəcəsinə, mövcud yanaşı xəstəliklərə uyğun olaraq, həkim və dietoloqların göstərişləri əsasında hazırlanır. Məsələn, şəkərli diabeti olan xəstələrin qida rasionu ürək-damar xəstəlikləri olan və yaxud yüksək təzyiqdən əziyyət çəkən xəstələrin rasionundan fərqlənir. Ona görə də, pasiyentlərə verilən pəhriz yeməkləri məhz onları müalicə edən həkimlərin təyinatı ilə mətbəxin peşəkar komandası tərəfindən hazırlanır:

 

"Yeməklər ciddi rejim əsasında, gün ərzində 4 dəfə və hər gün eyni vaxtda paylaşdırılır. Koronavirus xəstələrinə tərəvəzli şorbalardan tutmuş bol vitaminli meyvələrə qədər müxtəlif çeşidli qidalar verilir. Koronavirus xəstələrinin qidalanmasında zülal, bitki lifləri, vitamin və minerallar, antioksidantlarla zəngin məhsullardan istifadə olunmalıdır. Bu xəstələrdə immun sisteminin gücləndirilməsi üçün tərəvəz və zülallarla zəngin yeməklərə üstünlük verilməlidir.

 

Mətbəxdə istifadə olunan məhsullar təzə olmaqla yanaşı, həm də tərkibinə görə qiymətləndirilir. Belə ki, koronaviruslu xəstələr üçün yeməklər hazırlanarkən qanda şəkəri, xolesterolu artıran şirniyyatlardan, yağlı qida məhsullarından, duzlu və acılı qidalardan, qazlı içkilərdən istifadə etmək məsləhət görülmür. Mətbəxdə hazırlanan hər qidadan gündəlik olaraq analiz götürülür. Hər bir yeməyin istilik dərəcəsi yoxlanılır".

 

M.Kərimovanın sözlərinə görə, hazırlanmış yeməklər birdəfəlik qablarda paketlənir, üzərinə xəstələrin pəhriz masası və otaq nömrələri yazılaraq stasionara servis edilir. Hazır yeməklər qırmızı zonaya – koronaviruslu xəstələrin qaldıqları otaqlara xüsusi qablaşdırmalarda, gigiyenik qaydalara ciddi riayət etməklə çatdırılır. Yeməklər qırmızı zonaya çatdırıldıqdan sonra, xüsusi geyimdə olan tibb işçiləri onları xəstələr arasında siyahı üzrə paylayır. Beləliklə, yeməklərin xəstələrə çatdırılması tam təhlükəsizlik şəraitində həyata keçirilir.