Gicgah-çənə problemləri daha çox qadınlarda müşahidə olunur. Buna səbəb qadınlarda stresli halların çox olmasıdır. Müalicə üçün ilk növbədə problemə səbəb olan faktor aradan qaldırılmalıdır.
Bunu Aztibb.az-a açıqlamasında ağız və üz-çənə cərrahı Fariz Məmmədov deyib.
O, bildirib ki, belə bir problem yaranarsa, mütləq nədən qaynaqlandığına diqqət edilməlidir. Birinci yaranan sual isə problemin nə zaman başlamasıdır. Bu hal xroniki də ola bilər. Xəstə ilk dəfə belə bir problemlə qarşılaşıbsa digər faktorlara da baxmaq lazımdır. Əgər əvvəllərdə pasiyentdə belə narahatlıqlar olubsa, nə vaxt baş verdiyini bilməyimiz vacibdir. Pasiyent bu problemin nədən sonra yarandığı barədə təxmini də olsa məlumatlı olmalıdır. Məsələn, posttravmatikdir, yoxsa yatıb durandan sonra bu hal müşahidə edilib? Yaranan suallar müayinə və müalicənin aparılmasını asanlaşdırır. Məhz bu səbəblərə görə, xəstənin qəbul edilib müayinə olunması mütləqdir.
Gicgah-çənədə eşidilən səslər müxtəlif səbəblərdən ola bilər. Məsələn, səhv aparılmış diş müalicəsi də belə bir səsin eşidilməsinə gətirib çıxarır. Və çənədə ağrılar yarada bilir”, - deyə həkim qeyd edib.