Avstriya hökuməti aprel ayında koronavirusa qarşı peyvənd olunmuş, xəstəlikdən sağalmış və mütəmadi testdən keçən şəxslər üçün “yaşıl pasport” sistemi tətbiq edəcək.

Aztibb.az xəbər verir ki, bu barədə məlumatı Avstriyanın federal turizm naziri Elizabet Köstinqer təsdiqləyib. O, bildirib ki, Avropa İttifaqı səviyyəsində iyun ayının 1-dən etibarən belə bir rəqəmsal peyvənd pasportu qüvvəyə minməlidir və bununla da yay aylarında turizm fəaliyyəti təmin olunmalıdır. Turizm ölkəsi olan Avstriya bu istiqamətdə daha erkən addımlar atmaq niyyətindədir və yaxın günlərdə rəqəmsal sistemin hüquqi bazası yaradılmalıdır.

E.Köstinqer bu konsepsiyanın tətbiqinə erkən başlamağı səyahət mövsümünə kimi lazımi işlərin görülməli olduğu və həmçinin Avropa İttifaqı səviyyəsində hüquqi və texniki prosedurların gedişatından asılı olmamaq istəyi ilə izah edib.

Pandemiyanın mövcud olduğu müddət ərzində qüvvədə olacaq “yaşıl pasport“ pulsuz veriləcək, orada peyvənd, test və digər sertifikatlar elektron formatda qeyd ediləcək.