COVID-19 virusu bədənə daxil olarkən ACE2 reseptorundan istifadə edir. Bu reseptor ağciyər, ürək, böyrək və həzm sistemindən başqa, həm də əzələlərdə var. Ona görə əzələni də birbaşa zədələyir. Məhz bu səbəbdən koronavirusun yaratdığı mialgiya adi ağrıkəsicilərlə keçmir və uzun müddət davam edir.

Aztibb.az xəbər verir ki, bu barədə həkim-anestezioloq Şahin Məmmədov sosial şəbəkədə etdiyi paylaşımda məlumat verib.

O, bildirib ki, belə hallarda ağrıkəsici - iltihab əleyhinə vasitələrlə birgə “trisiklik antidepressantlar”ın istifadəsi məsləhət görülür. Bu növ antidepressantlar ilk kəşf olunan antidepressantlardır. Əlavə təsirləri çox olduğundan və təhlükəli hesab edildiyindən artıq müasir tibbdə antidepressant kimi istifadə olunmur.

Ölkəmizdə amitriptilin hələ də depressiyaya qarşı istifadə olunur. İnkişaf etmiş ölkələrdə isə bu qrup perepatatlar xroniki neyrogen ağrılar və müalicəsi başqa qrup antidepressantlarla mümkün olmayan ağır depressiyalarda istifadə edilir.

“Qeyd etdiyim kimi, bu qrupdan olan dərmanların dozadan artıq qəbulu çox təhlükəlidir və apteklərdə yalnız resept əsasında satılır. Həkimlər uzunmüddətli, ağrıkəsicilərə tabe olmayan əzələ ağrılarında bu preparatı nəzərə ala bilər”, - deyə həkim əlavə edib.