İlkin olaraq Böyük Britaniyada aşkar edilən və daha yüksək yoluxdurma imkanına malik koronavirusun VOC 202012/01 ştammı, bir həftə ərzində daha beş ölkədə aşkar edilib və belə ölkələrin ümumi sayı 111-ə çatıb. Cənubi Afrika Respublikasında aşkar edilmiş 501y.V2 ştammının yayılma coğrafiyası 58 dövlətə qədər genişlənib, ilk olaraq Braziliya və Yaponiyada aşkarlanmış P. 1 ştammı isə hazırda 32 ölkədə dövr edir. 

Aztibb.az TASS-a istinadən xəbər verir ki, bu barədə Ümumdünya Səhiyyə Təşkilatının (ÜST) həftəlik epidemioloji bülletenində deyilir.

Qeyd edilir ki, VOC 202012/01 ştammı martın 9-na olan vəziyyətinə görə daha beş ölkədə aşkar edilib və ümumilikdə ÜST-ün bütün altı regionunda 111 dövlət bu növ koronavirusun yaratdığı xəstəlik halları barədə məlumat verib. Araşdırmalara görə, koronavirusun bu növünün insanları yoluxdura bilməsi əvvəllər məlum olan SARS-CoV-2 koronavirus ştammından 36-75 faiz daha yüksəkdir. Mütəxəssislər xəstəxanaya yerləşdirilmə, həmçinin xəstəliyin və ölüm nəticəsinin daha ağır gedişinin mümkün yüksək riskinə işarə edirlər.

Koronavirusun 501Y.V2 növünə gəldikdə, o, martın 2-dən bəri üç ölkədə əlavə olaraq aşkar edilib, onların ümumi sayı hazırda 58-ə çatıb. ÜST-də olan məlumata görə, bu ştamm, ilkin SARS-CoV-2 ştammından 1,5 dəfə daha yoluxucudur. Öz növbəsində P.1 ştammı 32 ölkədə dövr edir və bir həftə ərzində belə ölkələrin sayı 35-ə çatıb. Yanvar ayında ÜST koronavirusun yeni variantlarının ortaya çıxmasının gözlənilən olduğunu bildirib, çünki daim mutasiya etmək viruslara xas olan xüsusiyyətdir. ÜST-nin Fövqəladə Hallar Komitəsi yanvarın 14-də keçirilən iclasında ölkələri koronavirus xəstəliyinə səbəb olan mutasiya törədicilərinin genom ardıcıllığı ilə bağlı elmi araşdırmaları genişləndirməyə, həmçinin mövcud məlumatları digər dövlətlərlə bölüşməyə çağırıb.

ÜST-ün məlumatına görə, koronavirusun VOC-202012/01 növü ötən ilin sentyabr ayında Böyük Britaniyada ortaya çıxıb. Cənubi Afrika Respublikasında 501y. V2 ştammı avqust ayının əvvəlindən mövcuddur, Braziliya və Yaponiyada isə P. 1 ştammı dekabr ayından dövr edir.