COVID-19 pandemiyası şəraitində ölkəmizdə əhalinin sağlamlığının qorunması, onların beynəlxalq standartlara uyğun tibbi yardımla təmin olunması hazırda həyata keçirilən dövlət siyasətinin prioritet istiqamətlərindəndir. Bu vəzifələrdən irəli gələrək Mərkəzi Gömrük Hospitalının da iş rejimi pandemiya xəstəxanasının tələblərinə uyğun olaraq dəyişdirilib.

 

Hospitalın koronavirus xəstələrinin müalicəsi ilə məşğul olan şöbələri ilə yanaşı, fəaliyyəti vacib olan, burada görülən işləri tənzimləyən İnzibati idarəetmənin təşkili şöbəsi də öz fəaliyyətini pandemiya dövrünün şərtlərinə uyğunlaşdıraraq qurub. Şöbə COVID-19 xəstələrini müalicə etmək üçün hospitala yeni həkimlər, o cümlədən infeksionistlər, tibb işçiləri cəlb edir.

 

Hazırda şöbənin əməkdaşları koronavirus pandemiyası ilə mübarizəyə yeni işçilərin cəlb olunması, mübarizəyə cəlb olunmuş əməkdaşların növbə cədvəli üzrə davamiyyətinin təmin edilməsi, TƏBİB-ə müvafiq məlumatların göndərilməsi, işçilərin mütəmadi olaraq COVID-19 testindən keçirilməsi işlərini həyata keçirirlər.

 

Aztibb.az xəbər verir ki, şöbənin rəisi Minurə Ağayeva deyib: “Koronavirus xəstələrini qəbul etməyə başladığımız ilk gündən etibarən hamımız bir amala – virusa yoluxmuş insanları xilas etməyə xidmət edirik. Hazırda sağalıb evə buraxılan COVID-19 xəstələrinin sayı günü-gündən artmaqdadır. Biz əminik ki, tezliklə bu mübarizədən qalib çıxacağıq”.