"Diabetik xəstələrdə yaraların əmələ gəlməsinin əsas səbəbi hissiyyatsızlıqdır. Ayaqqabı sıxması, kiçik daşın batması, spirtin dərini yandırması və sair kimi hallarda ağrı hissini digər insanlardan daha zəif hiss edirlər".
Bunu Aztibb.az-a açıqlamasında cərrah-fleboloq İsmayıl Əsgərov deyib.
Onun sözlərinə görə, sağalmış diabetik xəstələrin sonradan daha ağır problem yaşamaması üçün tövsiyə edilən corabları geyinmələri məsləhətdir.
"Belə xəstələr kiçik travmaları hiss etmirlər. 80% hallarda böyük yaralar, qanqrenalar bu səbəbdən yaranır. Sağalmış, sonradan təkrarlanan diabetik ayaq yaraları da adətən hissiyyatsızlığa görə əmələ gəlir.
Xəstə gəzdiyi zaman ayaqda bir hissəyə daha çox, o biri sahəyə daha az yük düşür. Sonradan döyənək, suluq şəklində təzahür edir. Ağrı hissi azaldığından zədələnmənin olduğu, yaranın əmələ gəldiyi ilk vaxtlar dəridən çıxan qanı, qırmızı-sarımtıl "suyu" görməzlər. Yekunda yara daha da irəliləyir, infeksiyalaşır və xəstələr gecikmiş halda müraciət edir. Bu xəstələrə ağ rəngli, əsasən pambıq tərkibli, boyun hissəsi baldırı sıxmayan corablar məsləhət görülür".