Hamiləlik dövründə qan uyğunsuzluğunu 10 dəqiqədə aşkar edən test hazırlanıb.

Aztibb.az Mediamagazin.com.tr-yə istinadən xəbər verir ki,  bu test professor Levent Kayrın və dossent-həkim Umut Kökbaş tərəfindən işlənilib.

Məlumatda bildirilib ki, hazırlanan test sarılıq, anemiya, beyin zədələnməsi, ürək çatışmazlığı və hətta müalicə olunmazsa ölümə səbəb ola biləcək Rh qan uyğunsuzluğunu aşkar etmək üçün sürətli və etibarlı üsuldur.

Əgər ananın qan qrupu Rh mənfi, körpənin isə Rh pozitivdirsə riskli vəziyyətdir. Hamiləlik dövründə ananın qanına keçən körpəyə aid olan Rh-pozitiv qan hüceyrələri ananın immunitet sistemini stimullaşdırır, ananın bədəni bu hüceyrələri təhlükə olaraq görür və antikorlar meydana gətirir.

Professor Levent Kayrın bu antikorların körpənin qan hüceyrələrini parçalayaraq ciddi bir təhlükə yaratdığını bildirib:

"Ananın qan qrupu Rh mənfi, ata Rh müsbətdirsə, körpə ilə ana arasında qan uyğunsuzluğunun olub-olmadığını müəyyənləşdirmək çox vacibdir. Rh uyğunsuzluğu riski olan hamiləliklərdə Rh təyini günümüzdə çox vaxt aparan və bahalı bir metoddur. Gələcək analara hamiləliyin 28-ci həftəsində və doğuşdan sonra 72 saat ərzində qan uyğunsuzluğu inyeksiya edilir. Bu zaman ərzində anada qan uyğunsuzluğu riskinin yaratdığı narahatlıq və stres hamiləliyə mənfi təsir edə bilər.

Yeni test üsulu ilə isə hamiləliyin 8-ci həftəsində qan uyğunsuzluğunun olub-olmamasını təyin etmək mümkündür".

Professor bildirib ki, test nəticəsində körpənin qan qrupu mənfi Rh olaraq aşkarlanarsa, deməli, ana ilə körpə arasında qan uyğunsuzluğu yoxdur:

"Hamiləlik baxımından heç bir risk daşımayan bu vəziyyətdə anaya qan uyğunsuzluğu inyeksiya edilməsinə ehtiyac olmur, əlavə müalicə tələb olunmur. Əgər körpənin qan qrupunun Rh pozitiv olduğu aşkar edilərsə, deməli, ana ilə körpə arasında qan uyğunsuzluğu riski var və körpəni qorumaq üçün qan uyğunsuzluğu inyeksiya edilməlidir. Hamiləlik çox daha yaxından izlənilməlidir".