Müsəlman zəvvarlar bu il Həcc ziyarətində yalnız COVID-19 əleyhinə peyvənd olunduqdan sonra iştirak edə biləcəklər.

Bu barədə Səudiyyə Ərəbistanının Səhiyyə naziri Tofiq ər-Rəbiyə bildirib.

“Həcc ziyarətinə qatılmaq üçün əsas şərt yeni növ koronavirusa qarşı peyvənd olunmaqdır”, - deyə o, qeyd edib.

Xatırladaq ki, bu il Həcc ziyarəti iyul ayının ikinci yarısına təsadüf edəcək.

Keçən il pandemiya səbəbindən Həcc ziyarəti yalnız 10 min nəfərin iştirakı ilə reallaşmışdı. Bunlardan 30 %-i səudiyyəli, 70 %-i isə ölkədə yaşayan xaricilər idi. Xaricdən gələn zəvvarlar Həcc ziyarətinə buraxılmamışdı.

Ötən ilin noyabr ayından etibarən Səudiyyə Ərəbistanı yaşı 50-dən yuxarı olmayan zəvvarları mənfi PZR testi nəticəsi ilə tədricən ümrə ziyarətinə buraxmağa başlayıb.