ABŞ və Meksika prezidentləri Co Bayden və Andres Manuel Lopes Obrador arasında virtual formatda danışıqlar olub.

Bu barədə Ağ Evin mətbuat xidməti məlumat yayıb.

“Onlar pandemiyaya reaksiya verilməsi, o cümlədən ictimai səhiyyənin imkanlarının genişləndirilməsi, informasiya mübadiləsi və miqrasiya siyasətinin işlənib hazırlanması sahəsində əməkdaşlığı dərinləşdirmək barədə razılığa gəldilər. Onlar ikitərəfli iqtisadi münasibətlərin strateji əhəmiyyətini dərk edərək Kanada, Meksika və ABŞ-ın ticarət razılaşmasına sadiq olduqlarını təsdiqlədilər. Hər iki lider təchizat zəncirinin dayanıqlığını və təhlükəsizliyini gücləndirmək barədə razılığa gəldilər, bu məqsədlərə nail olmaq üçün iqtisadi dialoqun yüksək səviyyədə bərpa edilməsinə razılıq verdilər”, - sənəddə deyilir.

Bundan başqa, prezidentlər təhlükəsizlik sahəsində, iqlim dəyişikliyinə və korrupsiyaya qarşı mübarizə, həmçinin miqrasiya siyasəti məsələlərində əməkdaşlığı müzakirə ediblər.