Həkimlik fəaliyyətimdə bu qədər dəhşətli bəla və qorxulu xəstəliklə üzləşməmişəm. Xüsusilə ötən il yeni növ koronavirus (COVID-19) infeksiyasının alovlandığı günlərdə xəstə axınının ardı-arası kəsilmir, xəstəxanada onları yerləşdirməyə çarpayı tapılmırdı. Gecəli-gündüzlü çalışsaq da, ağır vəziyyətdə olan xeyli xəstəni reanimasiya palatasına göndərməkdən xilas etmək olmurdu.

Aztibb.az xəbər verir ki, Kliniki Tibbi Mərkəzin həkim-infeksionisti İradə Acalova AZƏRTAC-a müsahibəsində koronavirusun yayılması əlamətlərini xatırlayaraq deyib: “İmmun sistemi güclü olanda xəstəliyin kliniki əlamətlərini özünü aşkar şəkildə büruzə vermir. Bunun əksi olduqda, ələlxüsus da yaş faktoru, yanaşı xəstəliklər olduqda onda xəstəliyin kliniki əlamətləri özünü daha aşkar büruzə verir və hətta bəzən xəstənin həyatını xilas etmək çətin olur. İnfeksion xəstəliklər zamanı daşıyıcılar xəstələrdən epidemioloji cəhətdən yüz dəfə daha çox təhlükəlidirlər. Onlar bir gündə bu virusu onlarla, yüzlərlə adama yoluxdura bilərlər. Hava-damcı yolu ilə yayılan infeksiyalara qarşı mübarizə aparmağın çətinliyi də elə bundadır. Ona görə də burada bircə yol qalır ki, o da kütləvi vaksinasiyanın aparılmasıdır”.

Həkim-infeksionist ötən ay peyvəndin ilk dozasını vurdurub və bunun infeksiyaya qarşı mübarizədə ən səmərəli yol olduğunu bildirib. O, COVID-19 infeksiyasına qarşı peyvənd vurdurarkən bəzi narahatlıqlar ola biləcəyini də inkar etməyib: “Peyvəndindən sonra inyeksiya olan hissədə ağrı, qızdırma ola, halsızlıq müşahidə oluna bilər. Əslində, bunlar bədənin peyvəndə qarşı verdiyi təbii reaksiyaların nəticəsidir və bir müddət sonra öz-özünə keçir. Yan təsirlərin qarşısını almaq üçün dərmanların əvvəlcədən istifadəsi tövsiyə edilmir. Yan təsirlər meydana gəldiyi halda həkim məsləhəti ilə bəzi dərmanlar qəbul edilə bilər. Peyvəndlərlə əlaqəli ciddi yan təsirlər adətən allergik reaksiyalardır və nadir hallarda rast gəlinir. Epileptik tutmaları və allergiyası olanlar peyvənddən əvvəl bu barədə mütləq həkimləri xəbərdar etməlidirlər”.