Son tədqiqatlar hidroksixlorokin dərmanının COVID-19 xəstəliyinə qarşı təsirsiz olduğunu üzə çıxarıb.

Aztibb.az xəbər verir ki, bu qənaətə Çin, Braziliya, İspaniya, Tayvan, Böyük Britaniya, Şimali Amerika, Misir və İrandan olan bir qrup alimin apardıqları tədqiqatlar nəticəsində gəlinib.

Onlar qeyd ediblər ki, öz xüsusiyyətlərinə görə hidroksixlorokin xəstəliyin müalicəsinə və koronavirus infeksiyasından ölüm dərəcəsinə təsir edə bilməz.

Hidroksiklorokin və xlorokinin COVID-19-dan müalicə edib-etmədiyini dəqiqləşdirmək üçün onların üzərində ümumilikdə 14 tədqiqat aparılıb.

Sözügedən tədqiqatların bəzilərini dərmanı istehsalı ilə məşğul olan əczaçılıq şirkətləri maliyyələşdirib.

Analizlər SARS-CoV-2 koronavirus infeksiyasının müalicəsində hidroksixlorokin və xlorokinin istifadəsinin əsassız olduğunu üzə çıxarıb.

"Bu dərmanları qəbul edən xəstələr özlərini daha yaxşı hiss etmirlər və yaxud da onlar tənəffüs cihazına bağlanması lazım gələn xəstələrin sayını azaltmağa qadir deyillər", - deyə tədqiqatçılar bildirib.