Oksford Universitetinin araşdırmasına görə, astma üçün istifadə edilən dərmanların COVID-19 səbəbilə xəstəxanaya yerləşdirilən insanların faizini azaltdığı və müalicə müddətini qısaltdığı məlum olub.

Aztibb.az xəbər verir ki, koronavirus simptomları ortaya çıxdıqdan sonra yeddi gün ərzində astma dərmanları istifadə edildikdə öz təsirini göstərir.

Tədqiqat xroniki ağciyər xəstəlikləri və astmanın müalicəsində istifadə olunan “budesonid aktiv” maddə tərkibli dərmanlarla aparılıb. Oksford Universiteti tərəfindən 28 gün ərzində 146 xəstənin nəzarətdə saxlanıldığı bir araşdırmada budesonidin tənəffüs zamanı çətinliyi, digər xəstələrə nisbətən reanimasiya və ya xəstəxanaya yatma riskini 90 faiz azaltdığı ortaya çıxıb.

Tədqiqatçıların məqsədi astma dərmanı qəbul edən insanların COVID-19 xəstəliyini digər xəstələrə nisbətən daha yüngül keçirməsi ilə bağlı müşahidələr aparmaq olub. Mütəmadi olaraq steroid tərkibli tənəffüs dərmanları istifadə edən şəxslərdə koronavirus səbəbilə xəstəxanaya müraciət nisbətinin aşağı olması tədqiqatçıların diqqətini çəkib.