Apteklərdə satılan sürətli COVID-19 testləri əsasən infeksiozluğu göstərir, infeksiyanı yox. 

Bunu anestezioloq-reanimatoloq Şahin Məmmədov deyib.

Həkim bildirib ki, burun-udlaqdan götürülmüş materialda virus həddən artıq çox olduqda test müsbət çıxır. Bu, əhalidə yüksək virus yüklü xəstələrin tez aşkar olunması baxımından əhəmiyyətlidir. Əgər bir pasiyentdə bu test müsbət çıxıbsa, deməli virus yükü yüksəkdir və həmin insan daha çox yoluxdurucudur. Lakin kimdə virus yükü azdırsa, yalnış olaraq neqativ cavab çıxacaq. Və həmin adam arxayınlaşaraq davranışına o qədər də nəzarət etməyərək ətrafdakılara virusu yayacaq.

"Deməli, kimdə həmin test müsbətdirsə, həmin şəxs ətrafdakılar üçün yoluxdurucudur və xəstəliyin ilk 5-10 günlüyündədir. Əgər cavab neqativ çıxarsa, tam arxayın olmaq olmaz, bu testlər infeksiyanı inkar edə bilmir. Ola bilər həmin insan koronavirusa yoluxub, lakin virus yükünüz azdır" - deyə, renimatoloq əlavə edib.