Britaniyada koronavirusa qarşı eyni zamanda bir neçə vaksin istifadə etməyin nə qədər effektiv və təhlükəsiz olmasına həsr edilmiş dünyada ilk tədqiqata başlanılıb.  

Aztibb.az meddaily.ru-ya istinadən xəbər verir ki, tədqiqatda 800-dən çox pasiyentin iştirakı ilə Oksford Universitetinin vaksininin ilk dozasının, daha sonra Pfizer vaksinin tətbiqinin effektivliyi öyrəniləcək. Alimlər ölkədə digər vaksinlərdən istifadəyə razılıq verildikdə vaksinlərin başqa kombinasiyalarını da sınaqdan keçirməyi planlaşdırırlar.  Ölkədə Moderna, Johnson and Johnson və Novavax-ın vaksinlərinin bazara çıxarılması gözlənilir.

Mütəxəssislərin fikrincə, vaksinlərin kombinasiyaları immun sisteminin müxtəlif hissələrini stimulyasiya etməyə və nəticədə daha güclü immun cavabı əldə etməyə imkan verəcək. Həmçinin virus daim mutasiya etdiyindən ekspertləri müxtəlif vaksinlərdən hazırlanan kokteyllərin koronavirusun yeni ştammlarından qoruya bilib-bilməməsi maraqlandırır. Bu faktı könüllülərin qanından və virusun mutant versiyalarından istifadə edərək yoxlamaq mümkün olacaq.

Əvvəlcə tədqiqat çərçivəsində səkkiz müxtəlif kombinasiya yoxlanacaq və 12 həftə və ya 28 gün intervalla peyvəndin vurulması rejimləri seçiləcək. Bir müddətdən sonra alimlər anticisimlərin səviyyəsinin ölçülməsi üçün qan nümunələri götürəcəklər.