Körfəz və Şimali Afrikanın bəzi ölkələrində COVID-19 pandemiyası ilə bağlı vəziyyət ağır olaraq qalır. Virusa qarşı peyvəndləmə və karantin tədbirlərinə baxmayaraq, yoluxma halları artmaqda davam edir.

Ötən gün Körfəz ölkələri arasında pandemiyanın daha ağır olduğu Birləşmiş Ərəb Əmirliklərində COVID-19-a 3962 nəfər yoluxub, 7 pasiyent isə həyatını itirib. Əmirliklərdə virusa yoluxanların ümumi sayı 297 min nəfərə çatıb, 826 insan isə vəfat edib. Dubay və digər iri şəhərlərdə karantin rejimi yenidən sərtləşdirilir. Artıq ticarət mərkəzləri, əyləncə məkanları və ictimai-iaşə obyektləri fəaliyyətini dayandırıb.

Şimali Afrikada ən acınacaqlı vəziyyət isə Tunisdədir. Cəmi 4 milyon əhalisi olan bu ölkədə ötən gün 2 mindən artıq yoluxma, 62 ölüm faktı qeydə alınıb. Tunis hökuməti pandemiya və ağır sosial-iqtisadi vəziyyət, habelə artan iğtişaşlarla bağlı komendant saatı tətbiq edib. Mart ayından bəri ölkədə 155 minə yaxın yoluxma, 6508 ölüm faktı qeydə alınıb.

Misirdə son sutka ərzində 521 yoluxma qeydə alınsa da, COVID-19-dan ölənlərin sayında azalma müşahidə olunmur. Belə ki, ötən sutka ərzində 52 nəfər həyatını itirib və artıq vəfat edənlərin sayı 10 minə yaxınlaşır. Pandemiya ilə bağlı vəziyyət ağır olsa da, Misirdə sərt karantin rejimi tətbiq olunmayıb. Bütün ticarət, iaşə və mədəniyyət obyektləri fəaliyyətini davam etdirir.